පාර්ලිමේන්තු ප්‍රජාතන්ත්‍රවාදය දුර්මුඛ කරලා
රාජ්‍ය සේවය ‘හිරිවට්ටලා‘ යන
මේ ඒකාධිපති ගමනට එරෙහිව පෙළ ගැසෙන්න
- ජානිපෙ නායක විමල් වීරවංශ
පාර්ලිමේන්තු ප්‍රජාතන්ත්‍රවාදය දුර්මුඛ කරමින් රාජ්‍ය සේවය ‘හිරිවට්ටවමින්‘ වත්මන් ආණ්ඩුව යන මේ ඒකාධිපති ගමනට එරෙහිව පෙළගැසෙන්නැයි, ජාතික නිදහස් පෙරමුණේ නායක, පාර්ලිමේන්තු මන්ත්‍රී විමල් වීරවංශ මහතා ප්‍රජාතන්ත්‍රවාදයට ගරු කරන මෙරට සියලූ ජන බලවේග වෙතින් ඉල්ලා සිටියි.
පසුගියදා බොරැල්ල එන්. එම්. පෙරේරා මධ්‍යස්ථානයේදී පැවැති ඒකාබද්ධ විපක‍ෂයේ මාධ්‍ය හමුවට එක්වෙමින් විමල් වීරවංශ මහතා මෙසේ පැවසීය.
එහිදී වැඩිදුරටත් අදහස් දැක් වූ විමල් වීරවංශ මහතා මෙසේද සඳහන් කළේය.
‘‘මහින්ද රාජපක‍්ෂ පාලනය ‘ඒකාධිපති රෙජීමයක්‘ විදියට හංවඩු ගහපු, සම්මුතිවාදී දේශපාලනයක් ගැන පම්පෝරි ගහපු මේ අය අද ගෙන යන්නේ කවරාකාරයේ ඒකාධිපති පාලනයක්ද, කියන එක ජනතාවට දැනෙමින් තිඛෙනවා. ජනවාරි 08 වැනිදා ‘හංස පූට්ටුවට‘ කර ගහපු අය කාලය ඛෙදා ගෙන පාර්ලිමේන්තුව තුළ කටයුතු කරනවා. කට්ටියක් ‘බෝලේ උස්සලා දෙන කොට‘ අනෙක් අය ‘ඩෑෂ් පාරවල්‘ ගහනවා. ජනතා විමුක්ති පෙරමුණට පවරා දී තිඛෙනවා හිටපු ආණ්ඩුවේ මැති ඇමතිවරුන්ට මඩ ගැසීම සඳහා බෝලේ ඔසවා දීමේ කාර්යයභාරය. ඒ අනුව ඩෑෂ් පාර ගහනවා ආණ්ඩුවේ ඇමතිවරු. අද තියෙන්නේ ඔවුනට ඕනෙ ආකාරයට සාදා නිමකර ගත්තු ආණ්ඩුවක් සහ විපක‍‍්ෂයක්.
රාජ්‍ය සේවයම අද හිරිවට්ටලා
පාර්ලිමේන්තු ප්‍රජාතන්ත්‍රවාදය ඒ විදියට මරන ගමන් අද මේ රටේ රාජ්‍යතන්ත්‍රය තුළ විශාල භීෂණයක් මවමින් යනවා. අද රාජ්‍ය සේවයේ නිලධාරීන් වැඩ කරන්නේ නැහැ, තීරණ ගන්නේ නැහැ. අද මේ කෙරෙන දඩයම දිහා බලලා මුළු රාජ්‍ය සේවයම හිරිවැටිලා ඉන්නවා තීරණ ගන්න බයයි. මේ ආණ්ඩුව බිඳ වැටුණු දවසක තමන්ටත් FCID වැනි ආයතනවලට යන්න වෙයි කියලා ඔවුන් හිතනවා.
එක පැත්තකින් පාර්ලිමේන්තු ප්‍රජාතන්ත්‍රවාදය දුර්මුඛ කරලා තිඛෙනවා. අගමැතිගේ අනුශාසනාව අනුව කටයුතු කරන, පොඩි ළමයෙක් වගේ කථානායකවරයෙක් පත්කර ගෙන තිඛෙනවා. ‘රටකට ඕනේ අපමණ අගයක්‘ කියමින් තමයි මේ අය බලයට ආවේ. අද රටට අපමණ අගය ලැඛෙමින් තිඛෙනවා. රුපියල කඩා වැටෙන්නේ, ආනයන භාණ්ඩ සියල්ලේ මිල ඉහළ යන්නේ ‘අපමණ අගය‘ කොතරම්දැයි පෙන්වා දෙමින්. තේ, රබර් ඇතුළු අපනයන භාණ්ඩවල මිල දිනෙන් දින පහළ යන්නේ ‘අපමණ අගය‘ කොතරම්දැයි පෙන්වා දෙමින්. ජනතාව ඉල්ලපු ‘අපමණ අගය‘ නොවෙයි අද ලැඛෙමින් පවතින්නේ.
‘අපමණ අගය‘ ලැබුණු අය
දෙමළ සන්ධානයත් දෙමළ ඩයස්පෝරාවත් ඉල්ලු ඉල්ලීම් පමණයි අද කඩිනමින් ඉටු කෙරෙමින් පවතින්නේ. ගෝලීය දෙමළ සංසදයේ ප්‍රධානී එමානුවෙල් පියතුමා කියනවා ‘ජනාධිපතිතුමා සහ අගමැතිතුමා අපට ආරාධනා කළා. අපි බලාපොරොත්තු වෙනවා ළගදීම ලංකාවට එන්න‘ කියලා. ඒ අයට අද ‘රතු පාවාඩ‘ එලනවා. අනෙක් පැත්තෙන් පාර්ලිමේන්තුවේ තමන්ට අවනත නැති අය, යුද්ධයට නායකත්වය දීපු අය මර්දනය කරනවා. ඒ වගේම රටේ ආර්ථීකය බිංදුවට බස්සනවා.
‘විපක‍්ෂ මන්ත්‍රීවරු කුල්ලෙන් වහන්න හදනවා‘
මේ තත්ත්වය ජනතාව ඉවසන්නේ නැති බව මේ අය දන්නවා. ඒ නිසා තමයි පාර්ලිමේන්තුවේ විරුද්ධ පක‍්ෂයේ මන්ත්‍රීවරු 48කගේ හඩට ඉඩ දෙන්නේ නැතිව ඔවුන්ව ‘කුල්ලෙන් වහලා මුල්ලෙන් තියලා‘ ජනතාවට නායකත්වය දීමට ඇති ඉඩකඩ අහුරන්නේ. ආගමන විගමන පාලකවරයාගේ ඉල්ලීමකින් හෝ කැඳවීමකින් තොරව පසුගියදා ගුවන්තොටුපළේදී රහස් පොලීසියේ නිලධාරීන් පැමිණ ප්‍රශ්නකර මා අත්අඩංගුවට ගනු ලැබුවා. එදින සවස 04:00ට පමණ තමයි මා අධිකරණයට ඉදිරිපත් කළේ. ගරු අධිකරණය සාධාරණ ලෙස ප්‍රශ්නය දෙස බලපු හින්දා මට ඇප ලැබුණා. සිකුරාදා සවස 04:00ට පමණ අධිකරණයට ඉදිරිපත් කළේ ඇප ලබා නොදෙයි කියලා බලාපොරොත්තුවෙන්. මේ වරද ඇප ලබා නොදිය යුතු වරදක් ලෙස ගරු අධිකරණයට පෙනී ගියේ නැහැ. ඒ වගේම ලබන වසරේ මැයි 03 වැනිදාට මේ නඩුව කල් යනවා. මේ තත්ත්වය යටතේ මා අනිවාර්යයෙන්ම රහස් පොලීසියට විරුද්ධව මානව හිමිකම් නඩුවක් ගොනු කරන්න බලාපොරොත්තු වෙනවා. ඒ පිළිබඳව මේ වන විට නීතිඥ මහත්වරුන් සමග සාකච්ඡා කරමින් සිටිනවා.
එදා රහස් පොලිස් නිලධාරීන් මගෙන් ප්‍රකාශය සටහන් කර ගත් අවස්ථාවේ අඩුම තරමින් මට නීතිඥ මහතකුගේ සහාය ලබා ගැනීමටවත් ඉඩ දුන්නේ නැහැ. ඒ විදියේ ඒකාධිපති ගමනක් තමයි අද මෛත්‍රීපාල සිරිසේන ජනාධිපතිවරයාත් රනිල් වික්‍රමසිංහ අගමැතිවරයාත් යමින් සිටින්නේ. ඒකට යටත් වෙන්නේ නැති මිනිස්සු මොන විදියකට හරි කොටුකර ගන්න බලනවා.
අද රටේ වැඩක් විදියට කෙරෙන්නෙ පලිගැනීම විතරයි. කාර්යක‍‍්ෂම රාජ්‍ය ආයතන වෙලා තියෙන්නේ මූල්‍ය අපරාධ කොට්ඨාසය, අල්ලස් කොමිසම, රහස් පොලීසිය හා අර බණ්ඩාරනායක සම්මන්ත්‍රණ ශාලාවේ දමා ගෙන ඉන්න කොමිසම පමණයි. අනෙකුත් කිසිදු ආයතනයක මෙලෝ වැඩක් කෙරෙන්නේ නැහැ. ඒ නිසා මේ අයට ‘අපමණ අගයක්‘ නොවෙයි මේ රටට ‘සුළු හෝ අගයක්‘ දීමට බැරි වෙලා තියෙනවා. ඒ බැරිකම වහගන්න ජනතාවට පෙන්වනවා ‘හොරු අල්ලනවෝ‘ කියලා නාට්‍යයක්.
‘හංස පූට්ටුවට රැවටුණු ජනතාව වෙතයි. . .‘
අද පාර්ලිමේන්තු මන්ත්‍රීවරයකුට තමන් දරන මතය විදෙස්ගත ශ්‍රී ලාංකිකයන්ට කියන්න තියෙන අයිතියවත් රකින්න බැරි ආණ්ඩුවක් බවට මේ ආණ්ඩුව පත් වෙලා තියෙනවා. ජනවාරි 08 වැනිදා මේ හංස පූට්ටුවට රැවටුණු ජනතාවට විශේෂ වගකීමක් තිඛෙනවා, ‘අපිත් මේ රට මෙවැනි තත්ත්වයකට ඇද දමන්න දායක වුණා නේද?‘ කියලා හිතලා ඊට එරෙහි වන්න.
මේ තත්ත්වයට එරෙහිව සටන් වදින්න ඒකාබද්ධ විපක‍ෂය සමග එකතු වෙන්න කියලා අපි මේ රටේ ප්‍රජාතන්ත්‍රවාදයට ගරු කරන සියලූ ජනතාවගෙන් ඉල්ලා සිටිනවා. ඒ වගේම අපි පසුගිය 19 වැනිදා කොළඹ විහාර මහා දේවී එළිමහන් රංග පීඨයෙන් අරඹපු ජනසමුළු මාලාව ඉදිරියේදී මාතර, අම්පාර ඇතුළු නගර ගණනාවක පැවැත්වීමට කටයුතු සූදානම් කර ඇති බවද පවසන්න කැමැතියි“
අනුරුද්ධ බණ්ඩාර රණවාරණ
මාධ්‍ය ලේකම්
ජාතික නිදහස් පෙරමුණ
2015.10.30
මෙම පුවත තවත් කෙනෙක්ට බලන්න Share කරන්න
